Жетібайдағы жұмыссыздардың аштық акциясы аяқталды

Бірнеше күннен бері мұнай кәсіпшілігіне барар жолды жауып тұрған Жетібайдың жұмыссыз халқы кеше түнде жолды ашты.

Жергілікті билік  босатылған жолдың видеосын растады.

Ел арасында әңгімелесу жұмыстары жүргізіліп, ауыл тұрғындары акцияны тоқтатуға шешім қабылдағаны хабарланды.

«Жергілікті атқарушы органдар жүргізген түсіндіру жұмыстарынан кейін қатысушылар өз әрекетін тоқтату туралы шешім қабылдады. Жергілікті атқарушы органдар, қоғам белсенділері мен барлық деңгейдегі мәслихат депутаттары Маңғыстау облысының тұрғындарын жұмыспен қамту мәселелерін шешу бойынша жұмысты одан әрі жалғастырады»  деп атап өтті әкімдік.

Наурыздың 29-нан 30-на қараған түнінен бастап, ауыл тұрғындары мұнай саласына жұмысқа орналасуды талап етті. Тіпті, «Альянс ЛТД», «Ақ жол құрылыс», «АЙКОМ ЛТД» серіктестіктерінің басшылары оларға өз компанияларына жұмысқа орналасуды ұсынса да, бас тартқан. Дегенмен әкімдік жұмыспен қамту мәселесі шешілетініне сенімді.