Жерді жеке меншікке беру туралы мораторийді тағы 5-7 жылға созу ұсынылды

Жер реформасы жөніндегі комиссияның 5-ші отырысы өтті. Отырыс барысында заңгер Бақытжан Базарбек жерді сату жөніндегі мораторийді тағы бірнеше жылға соза тұруды ұсынды.

— Жерді жеке меншікке беру туралы мораторийді тағы 5-7 жылға созу керек. Өйткені халық жердің сатылуына дайын емес, қоғамда әртүрлі әңгіме тарап жатыр. Одан басқа да ауыл шаруашылық жерлеріне  байланысты өзекті мәселелер бар. Мысалы шартты жер үлесі, оны пай жерлері дейді. Қанша мыңдаған шартты жер үлесіне байланысты жерлер жеке қолға кетеді,-деді Базарбек.

Сонымен қатар заңгер жер иелерінің реестрін құруды ұсынды.

— Екі ортада банкпен, ЖШС иелерімен де соттасуға да тура келеді. Оған Қызылордадағы жағдай куә, облыстық әкімдік алдында қаншама адам дауласып жүр. Кербұлақ ауданындағы «Бостан» кәсіпорнының жағдайы да тура сондай. Сондықтан шартты жер үлесі иелерінің реестрін құрып, оларды есепке алу керек. Одан бөлек банкке қойылған барлық шартты жер үлесімен байланысты  жерлерді тексеріп, есепке алу қажет. Жер құнын тексеріп, қайта қарау керек. Оның барлығы уақыт талап етеді,- деді ол.

Бақытжан Базарбек отырыс алдында халықпен сөйлескенін айтады. Оның сөзінше, жерді жеке меншікке беруге халық әзірше дайын емес.