«Жерден мүрденің қолы көрінді»: Ауылда әйелді көміп тастаған күдіктінің бұрын екі кісіні өлтіргені белгілі болды

Түркістан облысы Жетісай ауданына қарасты Алғабас ауылының тұрғындары көшеге шығудан қорқып отыр. 8 ақпанда ауылдағы үйлердің бірінің ауласынан жалаңаш әйелдің мәйіті табылған. Кейін оның сол ауылдың тұрғыны, 38 жастағы Әйгерім Әжікеева екені анықталды. Кісі өлтіру ісіне көршісі күдікті ретінде танылып, қамауға алынған. Алайда Әйгерімнің туыстары қылмысқа бір ғана адам емес, бірнеше адам қатысқан деп санайды. Orda.kz тілшісі Алғабас ауылына барып, ауыл тұрғындарымен сөйлесіп қайтты.

Туыстарының айтуынша, Әйгерім 20 қаңтар күні үйінен шығып, дүкеніне тауар алуға кеткен. Содан бері хабарсыз жоғалған. Алғаш болып дабыл қаққан анасы Мейрамгүл Бердалиева болыпты.

«Екі сағат өтті, Әйгерім әлі үйге қайтпады. Жүрегім бір жамандықты сезгендей, бірден іздей бастадым. Кейін басқа балалар да қосылып, ауруханаларды, зираттарды аралап шықты... Әйгерім ешқашан ескертусіз кетпеген. Сол кезде-ақ көршісінен күмәндана бастадық. Ол бұрын екі рет адам өлтіргені үшін сотталған. Бірден полиция шақырып, үйіне бардық. Бірақ ол ештеңе білмегендей, өзін ақтап шыға келді. Ал ертесіне ғайып болды», — деді марқұмның анасы.

Оқиға орнына келген тергеушілер ат байлайтын жерде шөппен жабылған шұңқырды тапқан. Сол жерден Әйгерімнің денесі табылған. Жалаңаш, аяусыз азапталғаны анық байқалған.

«Тісін тісіне басып, қатты қысып алған, түрін тану мүмкін емес. Бәрі ісіп кеткен. Құлағынан қан ағып тұрды, қолдары тілінген, арқасы көкала. Қызымды жай ғана өлтірмеген. Азаптап, зорлаған. Үстінде бір  киім болмады. Сол күні, денесін тапқан кезде, жоғалып кеткен көрші ауылға қайта келді. Өзі келіп, кінәсін мойындады»,  — деді марқұмның анасы.

Туыстарының айтуынша, күдікті бұл қылмысты жалғыз өзі жасамаған. Куәгерлер Әйгерімді соңғы рет ауыл дүкенінің маңында үрейлі күйде көрген. Сол кезде жанында күдікті мен тағы бірнеше ер адам жүрген. Отбасы дүкенге орнатылған бейнебақылау камераларының жазбасына әлі күнге дейін қол жеткізе алмай отыр.

«Тергеуге қатысты көп сұрағымыз бар. Камера жазбасын бізге көрсеткен жоқ. Әйгерім сол үйге өзі барғандай. Ал күдікті оны жай тұншықтырып өлтірдім деп отыр. Бірақ біз оның денесін өз көзімізбен көрдік — денесі көгеріп-соғылған, қолдары тілінген, басы мен мойны ісіп кеткен. Мұны бір ғана адам істей алмайды ғой?»,  — деді марқұмның әпкесі Ұлтуар Әжікеева.

Әйгерімде жоғалған күні 420 мың теңге болған. Бірақ денесі табылғанда не ақшасы, не киімі болмаған. Тергеу барысында күдіктінің он жыл бойы Әйгерімнен ақша бопсалап келегені, кейде қыз несие алып, соны төлеп отырғаны белгілі болды.

«Қызымның табысы тұрақты еді. Үй жанындағы дүкенді жүргізіп, көкпарға арналған тауарлар сатқан. Еңбекқор, өз ісіне жауапты болатын. Бар тапқанын неге сол адамға беріп жүргенін әлі күнге түсіне алмаймыз. Тергеудің барысына көңіліміз толмайды»,  — деді анасы

Туыстары күдіктінің тағы да жазадан құтылып кетуінен қорқады. Бұл — оның алғашқы ауыр қылмысы емес. Отбасының айтуынша, ер адам бұған дейін екі кісі өлтіргені үшін сотталған, бірақ екі жағдайда да мерзімінен бұрын босап шыққан.

«Бір кездері қорғансыз жетімді өлтіріп, бар болғаны жеті жыл отырды. Кейін тойда тағы бір ер адамды өлтірді. Сол үшін үш жыл ғана алды. Одан бүкіл ауыл қорқады. Қазір ол Әйгерім қарызын қайтаруды талап еткені үшін өлтіргенін айтып отыр», — деді марқұмның апасы.

Түркістан облыстық полиция департаменті бұл қылмыстық іс жақын арада сотқа жіберілетінін хабарлады.

«Алдын ала ақпарат бойынша, қылмыс тұрмыстық жанжал негізінде жасалған. Тергеу жұмыстары жүргізіліп жатыр. Іс жақын күндері сотқа жолданады»,  — деді облыстық ПД баспасөз қызметінің өкілі.

Әйгерім Әжікеева — тұрмыс құрмаған әйел болған. Оның ата-анасы — ІІ және ІІІ топтағы мүгедектігі бар жандар. Олар тек қызынан ғана емес, отбасының жалғыз асыраушысынан айырылып отыр.

Еске сала кетсек, Orda.kz осы оқиға жайлы жазған болатын.

Автор: Назерке Еркінбекқызы