Жер сілкінісі кезінде жанармай құю станциясына бару қауіпсіз бе?

Бүгін түнде көптеген алматылықтар жанармай құю бекеттеріне барды. Дегенмен, мамандар төтенше жағдайларда мұны ұсынбайды.

Брифинг барысында Ұлттық сейсмологиялық бақылаулар және зерттеулер ғылыми орталығының директоры Дәулет Сәрсенбаев азаматтарды тек ресми ақпарат көздеріне сенуге шақырды.

«Жанармай құю станциясына бару қауіпті. Деструктивті жер сілкінісі болған жағдайда екінші дәрежелі факторлар – жарылыстар, өрттер болуы мүмкін» деді Сәрсенбаев.

Ол қоғамда төтенше жағдайларды жою мәдениетін тәрбиелеу қажеттігін баса айтты.

«Бір себептермен біздің азаматтар ресми ақпарат көздеріне сенбейді. Сіздерді ең алдымен Төтенше жағдайлар қызметіне, құтқару қызметіне, жергілікті атқарушы органдарға сенім артуға шақырамын. Халық маңайдағы чатқа емес, өз жұмысын істеп жатқан мамандарға сенуі керек. Біздің міндетіміз журналистермен бірлесе отырып, азаматтарға ресми деректерді жеткізу» деді Ұлттық ғылым орталығының директоры.