«Жер дауы»: Тұздыбастау әкімі тұрғынмен «жекпе-жекке» шықты

Алматы облысында Тұздыбастау ауылдық округі әкімінің үстінен тұрғынмен төбелескені үшін қызметтік тексеру ісі басталды.

Әлеуметтік желілерде тараған бейнежазбада Тұздыбастау ауылының тұрғыны өзін әкім соққыға жығып, тілдеп, қорлағанын айтты. Ер адамның сөзінше, жанжал оның заңды жер учаскесінің бағасын түсіріп, қызыл аймаққа кіргізгенінен басталды. Жерінің мәселесін айтып барғанда тұрғын әкімнің өзіне қол көтергенін айтты.

«Ол мені тамақтан ұрып жіберді. Күшті соққы болды. Қатты тиді. Жылдамдықпен келіп тиді. Тамағым қысылып қалды. Содан кейін мені тілдеп, жаман сөздер айтты. Менің денем көгерді», — дейді ер адам бейнежазбада денесінің көгерген жерлерін көрсетіп.

Алматы облысы әкімдігі ер адамның әкімді физикалық күш қолдану және мемлекеттік қызметкердің этикалық кодексін бұзу бойынша айыптап отырғанын растады.

«Бір тұрғын бекітілген жоспарға наразылық білдірді. Оның жер учаскесі қызыл сызық бойында орналасқан еді. Бұл жанжалға себеп болды. Қазіргі уақытта Тұздыбастау ауылдық округі әкіміне қатысты Талғар ауданы әкімдігі мен Талғар ауданы полиция басқармасы қызметтік тексеру жүргізіп жатыр» деп хабарлады облыс әкімдігінің баспасөз қызметі.

Егер әкімнің кінәсі расталса, оның ісін Алматы облысы мемлекеттік қызмет істері агенттігінің этика кеңесі қарайды.