Жеңіс Қасымбек Тоқаевқа есеп берді

Президент Қасым-Жомарт Тоқаевқа Астана қаласының әкімі Жеңіс Қасымбек елорданың әлеуметтік-экономикалық және инфрақұрылымдық дамуы туралы баяндады.

Ақорданың баспасөз қызметі хабарлағандай, Жеңіс Қасымбек Тоқаевқа тұрғын үй алаптарын дамыту, апатты жағдайдағы ескі тұрғын үйлерді бұзу, әлеуметтік нысандар салу, құрылысы ұзаққа созылған нысандарды аяқтау, шағын және орта бизнесті қолдау, жұмыс орындарын ашу және қаланы абаттандыру мәселелері жөнінде есеп берді.

Сондай-ақ мемлекет басшысына ауызсу стансасы (ССС-3), жылу электр орталықтары, газ жылу стансалары құрылысының барысы туралы мәлімет берілді.

ССС-3 стансасының бірінші кезеңін маусым айының соңында, екінші кезеңін биыл тамызда іске қосу жоспарланған.

Қасым-Жомарт Тоқаев Астананың әлеуметтік және инженерлік инфрақұрылымын одан әрі дамыту, қаланы абаттандыру, көгалдандыру, сондай-ақ жылыту маусымына дайындық жөнінде бірқатар тапсырма берді.