Жемқор шенеуніктердің мемлекеттік тізілімін жасау талқыланды

Астанада Мәжіліс жанындағы Қоғамдық палата мүшелері парламентшілермен және сарапшылармен бірлесіп, сыбайлас жемқорлыққа қарсы іс-қимыл мәселелеріне қатысты заң жобасын талқылап, сыбайлас жемқорлыққа жол берген шенеуніктердің мемлекеттік тізілімін жасауды қарастырды, деп хабарлайды Orda.kz.

Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұловтың айтуынша, ұсынылған түзетулер арқылы сыбайлас жемқорлыққа қарсы саясат тұжырымдамасы ішінара жүзеге асырылуда.

«Негізгі заң жобасы алтыдан астам саланы қамтиды. Оның ішінде сыбайлас жемқорлыққа жол берген лауазымды тұлғалардың мемлекеттік тізілімін енгізу, пара ұсыну және уәде беру, сондай-ақ пара алуға, сұрауға немесе талап етуге келісім бергені үшін қылмыстық жауапкершілік және т.б. бар», - деді Сарқұлов.

Оның айтуынша, қазір үш кодекс пен бес заңға өзгерістер мен толықтырулар енгізіліп, Әкімшілік кодекске соған қатысты жоба енгізілуде.

Қазақстандағы парламентаризмді дамыту қорының президенті Зәуреш Батталова заң жобасын қолдады. Бірақ, оның пікірінше, ұсынылған стандарттарды тиімділік тұрғысынан қайта қарастырған дұрыс.

 «Осы түзетулермен сіз өзіңіз көтере алмайтын шоқпарды белге байлайсыз, бұл үшін ақша, адам ресурстары мен уақыт жеткіліксіз. Сондықтан заң жобасын түбірімен қайта қарап, елдегі сыбайлас жемқорлықты азайтуға және оның алдын алуға не әсер ететінін жалпы талқылау қажет», - деді Батталова.

Ол сондай-ақ заң жобасында іскерлік және саяси сыбайлас жемқорлыққа қатысты нормалардың жоқтығын, оны құжат арқылы кейінгі жұмыстарға қосу керектігін атап өтті.

Сонымен қатар, ол сыбайлас жемқорлыққа қарсы сараптаманың рөлін күшейту қажет деп санайды.

Алматы жоғары менеджмент мектебінің президенті Қанат Нұров бопсалау түрінде пара беру уәдесін ерекше атап өтіп, пара беру уәдесі үшін қылмыстық жауапкершілікті нақтылау қажеттігін айтты.

Әйтпесе, оның пікірінше, мұндай парақорлар тергеумен ынтымақтаса алмайды, өйткені олар бірден ұсынылған бап бойынша жауапқа тартылады.

Саясаттанушы Данияр Әшімбаев құқық қолдану тәжірибесі мәселелеріне тоқталды. Мысал ретінде ол ақша ұсынып әкім болғысы келген адам жәбірленуші деп танылып, сыбайлас жемқорлық құқық бұзушылық жасауға әрекеттенгені үшін жауапқа тартылмаған «әкім қызметінің сатылатыны» туралы белгілі жағдайды келтірді.

Осыған байланысты мен осындай атышулы істерге қатысты құқық қолдану тәжірибесіне талдау жүргізілсе деймін. Яғни, біз заңды жазамыз, содан кейін олар жүзеге асыру тұрғысынан күлкілі жағдайға дейін жетеді. Нормаларды қатайту туралы заң енгізбес бұрын, бұл нормалардың іс жүзінде беделін түсірген жағдайларды қарастыру қажет», - деп есептейді Әшімбаев.