Жемқорлықтың кесірінен мыңға жуық ауыл сусыз отыр

Қазақстанның 1200-ге жуық ауылы әлі күнге дейін ауыз сусыз отыр.

Бұл туралы Orda.kz ҚазАқпаратқа сілтеме жасап хабарлады.

Antikor Live бағдарламасында ҚР Парламенті Мәжілісінің депутаты Ерлан Саиров 1200-ге жуық ауылда ауызсу жоқ деп мәлімдеді.

– 30 жыл ішінде ауызсу мәселесіне 1 трлн теңге жұмсалған. Елімізде 1200-ге жуық ауыл әлі күнге дейін ауыз сумен қамтамасыз етілмеген. Мемлекет басшысы 2025 жылға дейін ауызсу мәселесін 100% шешу керек екенін айтты, - деді Ерлан Саиров.

Депутаттың айтуынша, ауызсумен қамтамасыз ету мәселесі шенеуніктер арқылы қаржыландырылады.

– Бұл бағытта проблема көп. Мысалы, Шығыс Қазақстан, Алматы облыстарында ауылдан екі шақырымдық жерге су шығаратын үлкен насостар орнатылған. Әрбір насосқа 30-40 млн теңге кетеді. Бірақ сол ауылдарға магистраль тартылмаған. Магистраль тартылғанша ол насостар істен шығып қалады. Сонда халықтың қаншама миллиард теңгесі желге ұшуда. Мұның бәрі жергілікті шенеуніктердің немқұрайлығы. Немқұрайлылық - жемқорлықтың түптамыры, - деді ол.