Жемқор шенеуніктердің туыстарына шектеу жоқ - антикор

ҚР Сыбайлас жемқорлыққа қарсы қызметі Қанат Шарлапаевты «Бәйтерек» ұлттық басқарушы холдингі» АҚ басқарма төрағасы қызметіне тағайындауға қатысты пікір білдірді.

Олардың айтуынша, жемқор шенеуніктердің туыстарына ешқандай шектеулер жоқ.

«Қолданыстағы заңнамада сыбайлас жемқорлық қылмыстарын жасағаны үшін жақын туыстары қылмыстық жауапкершілікке тартылған адамға қатысты шектеулер қарастырылмаған» деді Антикор төрағасының бірінші орынбасары Олжас Бектенов ҚазТАГ-ке берген жауабында.

Еске салсақ, 2 ақпанда Ресейдің Саратов облысының тумасы Қанат Шарлапаев «Бәйтеректің» басшылығына тағайындалды.

Кейін Қанат 2016 жылы қарашада Ресейде жемқорлық қылмыс жасағаны үшін сотталған Бисімбай Шарлапаевтың ұлы екені белгілі болды. Көрсетілген туыстық ұлттық холдингтің қазіргі басшысының әкесінің өмірбаяндық мәліметтерімен расталады.