Жем мен Ойыл өзендеріндегі көпірлер су тасқынының астында қалды

Ақтөбе облысында еріген қар суының ағуынан республикалық және облыстық маңызы бар жолдарда 15 су тасу оқиғасы тіркелді. Барлық жерде дерлік судың тартылғаннан кейін жолдар жөнделді, деп хабарлайды «Диапазон».

«Қобда ауданындағы Жиренқопадан әрі қарай «Шұбарқұдық-Ойыл-Соль-Илецк» тас жолында әлі де су бар, көлік қозғалысы жабық. Тұрғындар айналма жолды пайдаланады. Су басылған соң барлығы ретке келтіріліп, көлік қозғалысы ашылады. Сондай-ақ, Темір ауданындағы Ащысай мен Шығырлы аралығындағы Ақтөбе-Болғар-Шұбарқұдық тас жолында көлік қозғалысы әлі де шектелген. Онда тек жеңіл көліктер жүреді. Жол 1 мамырға дейін жөнделеді», - дейді жолаушылар көлігі және автомобиль жолдары басқармасының басшысы Бекболат Нұрашев. 

Тағы екі көпірдің мәселесі бар.

«Ембі маңында, Жем көпірінде су тасқыны кезінде көпір тірегі суға батып кетті, көліктер жүре алмайды, Ембіге Жаңажол арқылы жетеді, бұрынғыдай 92 емес, 160 шақырымдай жүреді. Көпірге 47 жыл болған, ескі, оның жанында жаңасы салынады. Оған дейін адамдар көлікпен жетіп, көпірден жаяу өтеді», - дейді «ҚазАвтоЖол» ҰК» АҚ Ақтөбе облыстық филиалының директоры Айбол Данагүл. 

Ойыл өзені арқылы өтетін  жол жоқ. Онда да өзендегі көпірдің тіректері су астында қалған.

«Тұрғындар өзеннен қайықпен немесе понтонмен, ал көпірден жаяу өтеді. Өткелге дейін бір шақырым уақытша жол салынса, тағы бір айналма жол салынады. Ойыл өзені арқылы өтетін көпір сараптамадан өтті, жөндеу жұмыстары күтілуде, жұмыстар биыл аяқталады», - деп қосты Бекболат Нұрашев.