Желтоқсан қаһармандарының өшпес ерлігі тарихымызға мәңгі жазылды – Тоқаев

Қазақстан президенті Қасым-Жомарт Тоқаев өзінің Twitter парақшасында 1986 жылғы Желтоқсан оқиғалары туралы жарияланым жасады.

«Осыдан 35 жыл бұрын қазақ жастары Кеңес одағының өктемдігіне қарсы шықты. 1986 жылғы наразылық шеруі халқымыздың бостандыққа ұмтылысын көрсетті. Тәуелсіздіктің алғашқы қарлығаштары – Желтоқсан қаһармандарының өшпес ерлігі біздің мемлекеттілік тарихымызға мәңгі жазылды» делінген президент хабарламасында.

Осыдан 35 жыл бұрын қазақ жастары Кеңес одағының өктемдігіне қарсы шықты. 1986 жылғы наразылық шеруі халқымыздың бостандыққа ұмтылысын көрсетті. Тәуелсіздіктің алғашқы қарлығаштары – Желтоқсан қаһармандарының өшпес ерлігі біздің мемлекеттілік тарихымызға мәңгі жазылды.

— Qasym-Jomart Toqayev (@TokayevKZ) December 17, 2021

1986 жылғы Желтоқсан оқиғасы КОКП ОК бас хатшысы Михаил Горбачевтің Қазақстан Компартиясының басшысы қызметінен Дінмұхамед Қонаевты алып тастауы мен оны Қазақстанда бұрын жұмыс істемеген Геннадий Колбинге ауыстыру туралы шешіміне байланысты болды.

Жарияланған мәліметтерге сәйкес, 1986 жылғы 17-18 желтоқсанда Алматыда милиция жасағы мен әскерилермен болған қақтығыстарда 1,7 мыңнан астам адам ауыр дене жарақатын алған. Құқық қорғау күштері митингке қатысушылардың 8,5 мыңын ұстады.