Желідегі «жарнама батырлары» заңнан жалтара ма?

Мәжіліс депутаты Ерлан Сайыров вице-премьер Серік Жұманғаринге инфлюенсерлердің жұмысын қатаң бақылауға алуды ұсынды. Оның айтуынша, әлеуметтік желілерде тауарлар мен турларды сатуды жамылған заңсыз ұтыс ойындары көбейіп барады, деп хабарлайды Orda.kz.

Сайыровтың айтуынша, блогерлер жеңіл ақша табу иллюзиясын қалыптастырып қана қоймай, жарнама, курстар мен ақылы жазылымдардан қомақты табыс тауып, салық төлеуден жалтарады.

Үкімет депутаттық сауалға жауап ретінде блогерлерге бақылауды күшейтіп, жаңа Салық кодексіне тиісті нормаларды енгізуді жоспарлап отырғанын растады. Құжатқа сәйкес, қосылған құн салығын төлеуші ретінде тіркелмеген немесе камералдық бақылаудан кейін бұзушылықтарды жоймаған компаниялардың сайттары бұғатталады.

«Жаңа Салық кодексі жобасында шетелдік маркетплейстердің салық салуын реттейтін нормалар қарастырылған. Сондай-ақ, қосылған құн салығын төлеуші ретінде тіркелмеген немесе бұзушылықтарды жоймаған жағдайда маркетплейс сайты бұғатталады»,  деп хабарлады Ұлттық экономика министрлігі.

Министрлік 2022 жылдан бастап Қазақстанда шетелдік интернет-компаниялар үшін салықтық тіркеу енгізілгенін еске салды. Қазіргі уақытта жаһандық цифрлық алпауыттарды қоса алғанда, жүзден астам платформа тіркелген. Олардың жалпы түсімі 83 миллиард теңге болды.

Блогерлерге келетін болсақ, олар кәсіпкер ретінде тіркелуге, жарнаманы белгілеуге және онлайн-платформалар туралы заң талаптарын сақтауға міндетті. Сонымен қатар, цифрлық сауда қатысушыларын қолдау шаралары жаңа салық заңнамасын әзірлеу аясында талқылануда.

Бұған дейін қазақстандық инфлюенсерлерге Мемлекеттік кірістер комитеті тарапынан талаптар қойылғаннан кейін миллиардтаған пайда туралы есеп бергені хабарланған еді.