Желі қолданушылары имамдардың пәтуасына қарсы шықты

Бір туған ағайындылардың балалары отбасын құра берсе болады деген мәлімдеме жасаған имамдар желіде қызу талқыға түсті.

Көрші қырғыз молдалардың айтуынша, жеті атасыз қыз алыспайтын қазақтың ұстанымы дұрыс емес.

Экспресс К басылымы бұл туралы баяндаған молданың видеосын кәсіпкер Ахметбек Нұрсила жариялағанын хабарлады. Алайда кәсіпкердің парақшасындағы видео өшірілген.

Имамдар тіпті шариғаттан, құраннан өз сөздеріне дәлел келтірмекші болған.

«Ниса сүресін қарасаңыздар бір туғандар, 4-5 атасы емес, бір-екі туғанның балалары үйленсе болады. Ешмат пен Ташмат бір туған. Соның балалары бір-бірін алса болады. Бөлелер — Зейнеп пен Фатима, екеуі бір ата-анадан туған. Олар үйлене берсе болады» деді имам.

Оның айтқанын тағы бір имам қолдады. Оның айтуынша, шариғат бойынша бір туған ағайынның балалары бір-бірін алса болады.

«Мына имамдардың айтуынша ағайынды адамдардың балалары бір — біріне үйлене беруіне әбден болады екен... «Жеті ата өтпей үйленуге болмайды» деген сонда қазақтың надандығы ма? «Шымшық сойса да қасапшы сойсын» дейсіздер ғой... Сонда осы имамдарды, ислам ғалымдарын тыңдасақ не болғаны? Ұрпағымыз азғын болып кетпей ме?» деп жазды кәсіпкер Ахметбек Нұрсила.