Жеке компания қолданылған суды Каспий теңізіне төгіп отырған

Осыған байланысты «Aktau tourism city ltd» компаниясына қатысты алты әкімшілік іс қозғалды.

Маңғыстау облысы бойынша экология департаменті «Aktau tourism city ltd» жеке серіктестігі филиалында Каспий теңізі мен Қаракөл көліне ағынды сулардың қосылуы  фактісі бойынша жоспардан тыс тексеру жүргізді, деп хабарлайды ведомствоның баспасөз қызметі.

Тексеру кезінде ағынды сулардың  қосылуы тіркелді. Бұл ҚР Экологиялық кодексінің 222-бабының 8-тармағының талаптарын бұзады.

 «Бүгінгі таңда компания  хлорланған бассейн суы ағызылатын құбырдың көзін жойды, екінші құбырды алып тастау  жұмыстары жүргізілуде. Айта кету керек, кәсіпорын бассейн суларын және теңіз суын тұщыту қондырғысында тазартқаннан кейін ағызып отырған»  дейді ведомствоның баспасөз қызметі.

Бұл ретте тексеру су құрамында  нитраттар мен хлоридтердің  белгілі нормадан артық екенін анықтады. 2021 жылдың 15 қыркүйегінен бастап суларды тазарту қондырғысындағы техникалық ақауларға байланысты кәсіпорын ағынды суларға биологиялық тазарту  жүргізбеген.

«Aktau tourism city ltd» ЖШС-не қатысты «Әкімшілік құқық бұзушылық туралы» Қазақстан Республикасы Кодексінің 324, 325, 326, 328, 331, 332 баптары бойынша алты әкімшілік іс қозғалды.

Экология департаменті Маңғыстау облысының табиғи ресурстар және табиғатты пайдалануды реттеу басқармасына кәсіпорынға қоршаған орта туралы бұрын берілген рұқсатты қайтарып алу мәселесі бойынша хат жазды.

Бұған дейін Қазақстанда судың аздығына байланысты проблемалар туралы хабарланған болатын. Экология министрлігін әсіресе Сырдария өзені алаңдатып отыр. Бүгінде Шардара мен Көксарай су қоймаларыда  өткен жылмен салыстырғанда 770 миллион текше метр су аз жиналған.