Жеделсатыдағы екі ер адам: қылмыстық іс қозғалды

Әлеуметтік желіде жеделсатыда сүйісіп тұрған «Энергетика министрлігінің шенеуніктеріне» байланысты қылмыстық іс қозғалды.

Ішкі істер министрлігі департамент қызметкерлеріне қатысты жалған ақпарат тарату фактісі бойынша қылмыстық іс қозғалғанын хабарлады.

Алайда кімнің жауапқа тартылатыны әлі нақтыланған жоқ.

«Энергетика министрлігі қызметкерлерінің жеделсатыда болған оқиғаға қатыстылығына байланысты бұрын әлеуметтік желілерде тараған шындыққа жанаспайтын ақпаратқа сәйкес, ҚР Қылмыстық кодексінің 274-бабының 2-бөлігі бойынша қылмыстық іс қозғалды.

Азаматтардың құқықтары мен заңды мүдделеріне елеулі зиян келтіретін жалған ақпаратты таратқаны үшін қылмыстық жауапкершілік көзделетіні туралы хабарлаймыз» делінген хабарламада.

Еске салсақ, әлеуметтік желілерде Астанадағы жеделсатыда сүйісіп тұрған екі ер адам видеоға түсіп қалды. Кейбір telegram-арналар видео кейіпкерлерін Энергетика министрлігінің қызметкерлері деп атады. Бірақ министрлік бұл ақпаратты жоққа шығарды.

«Таратылған видеодағы адамдар Энергетика министрлігінің қызметкерлері емес. Ақпарат шындыққа сәйкес келмейді. Мән-жайды анықтау үшін департамент тиісті органдарға хабарласады» деп мәлімдеді ведомство.