Жедел жәрдем көлігіне баласы шанамен апарған әкенің жағдайы

Қостанай облысында болған  қатты боран салдарынан  жолдар жабылып қалғанда шақырған жерге дейін жедел жәрдем көлігі жете алмаған. Науқас әкесін шанаға салып сүйреген  қаршадай бала әкесін жедел жәрдем дәрігерлерінің қолына табыстаған болатын.

Оқиға 11 наурызда Арқалық маңындағы Родинский ауылдық округінде болған. Олимпийский ауылына бара жатқан жедел жәрдем ауруханаға шұғыл жатқызуды қажет ететін науқасқа жете алмаған. Жедел жәрдемге тезірек жеткізу үшін ұлы науқасты шанамен сүйреген. Бұл факт туралы облыстық денсаулық сақтау басқармасында түсініктеме берілді.

— Екінші санаттағы шұғыл шақыру тобы Родина ауылынан келді. Науқас 46 жаста, улы затпен уланған. Ер адам бөтелкедегі суды улы затпен шатастырып, байқаусыздар ішіп алған. Жедел жәрдем жағдайдың ауыр екенін ескеріп, науқастың көлікке өз бетімен келуі керек екенін айтқан,  деді облыстық денсаулық сақтау басқармасының баспасөз хатшысы Ксения Жылқыбаева.

Арқалық қаласының әкімі Қайрат Әбішев те тазартылмаған жолдардың жағдайын түсіндіріп өтті.

— Бірнеше күнге созылған ұзақ жауған қар мен дауылдың салдарынан Родина селосының құрамына кіретін Олимпийский кентін қоса алғанда, Родина кентінің жолдары мен жүріс  бөліктері жабылып қалды. Коммуналдық қызметтер жол тазарту жұмысын жүргізгенімен, түнде тағы қалың қар жауды.  Бірінші кезекте қоғамдық көліктің  жүруіне арналған жолдар тазартылды. Ауа-райы жағдайлары көлік қозғалысы үшін, әсіресе Олимпийский елді мекені бағытында белгілі бір қиындықтар тудырды. Қазіргі уақытта жол тазартылып, барлық бағыттағы қозғалыс  қалпына келтірілді,  деп түсіндірді әкім.