Жеңілдетілген автонесиені алу шарттары жарияланды

Жеңілдетілген автокөлік несиесі туралы шешімді Қазақстан үкіметі қабылдады, деп хабарлады Индустрия және инфрақұрылымдық даму министрлігі индустриялық даму комитеті төрағасының орынбасары Олжас Сапарбеков.

«ҚР Үкіметі ағымдағы жылдың 15 сәуірінде 100 млрд теңге көлемінде жаңа автонесие бағдарламасын қаржыландыруды және автобус паркін жаңартуға лизингтік қаржыландыруды 30 млрд теңге көлемінде қарастыратын қаулы қабылдады. «Жасыл Даму» операторы арқылы бұрынғы бағдарламаға қатысқандар да бағдарламаға қатыса алады. Электронды кезек қалыптасады» деді Сапарбеков бейсенбі күні брифингте.

Бағдарламаның негізгі шарттары:

• көлемі 10 млн теңгеден аспауы тиіс;
• несие екі жылда бір рет алынады;
• несие 7 жылға беріледі;
• бастапқы жарнасыз;
• автокөліктің құны 15 млн теңгеге дейін.

«Қазіргі таңда бағдарламаны жүзеге асыру үшін «Жасыл Даму» АҚ-на қажетті қаражатты аударуға байланысты рәсім жүргізілуде» деп қосты спикер.

Ол 2015 жылдан бері елімізде жеңілдетілген автонесие бағдарламасы жұмыс істеп жатқанын атап өтті.

«2021 жылдың мамыр айына дейін 82 млрд теңге бөлінді. 2022 жылдың 31 наурызындағы жағдай бойынша бұл сомаға 30 мың автокөлік сатып алынды, айналым қаражатының айналымы есебінен 162 млрд теңгеге несие берілді. Яғни, қайтарылған сома өтініш берушілердің жаңа несиелеріне түседі. Қолжетімді көліктердің тапшылығын ескере отырып, үкімет жеңілдетілген автонесиенің жаңа бағдарламасының іске қосылғанын хабарлады. (…) Бағдарлама екінші деңгейлі банктер арқылы жүзеге асырылады: Халық банкі, Еуразиялық банк, Jusan Bank, Bank Center Credit, Forte bank» деді Сапарбеков.