Жеңілдетілген автонесиемен алынатын көлік құнына шек қойыла ма?

Үкімет отырысында Индустрия және инфрақұрылымдық даму министрі Қайырбек Өскенбаев сәуір айының соңына дейін отандық көліктерді сатып алу үшін жеңілдетілген автонесие бағдарламасы бекітілетінін мәлімдеді. Көліктің құны шектелмейді, несие 10 млн теңгені ғана өтейді.

«Жеңілдетілген автокөлік несиесі үшін біз автокөліктер 10 млн теңгеге дейін қаржыландырылады деп айтамыз, бірақ сіздің қымбатырақ көлік алуға құқығыңыз бар, айырманы өз қаражатыңыздан төлейсіз. Сәуірдің аяғында 4 пайызбен жеңілдікпен несиелеу басталады» деді ол.

Сонымен қатар, Индустрия және инфрақұрылымдық даму министрі күн сайын баға өзгерсе де, автокөлік бағасы шарықтамайтынына сенім білдірді.

«Біз қазақстандық көліктер бағасының айтарлықтай өсуін күтпейміз. Әрине, қолмен жұмыс режимінде баға күн сайын өзгереді. Біз арматураның құнын тексердік, 10 күн бұрын тоннасы 480 000 теңге, кеше 418 000, бүгін таңертең 415 000 болды. Яғни, бағалар, өкінішке қарай, секірмелі, сондықтан бағаның ертең қандай болатынын айту қиын, көптеген позицияларда төмендеу тенденциясы байқалады» деп атап өтті Өскенбаев.