Жеңілдетілген автонесие келесі аптадан бастап беріледі

«Жасыл Даму» 6 мамырда Индустрияны дамыту қорына жеңілдетілген автокөлік несиесі үшін 100 млрд теңге бөліп, аударады. Бұл туралы Индустрия және инфрақұрылымдық даму министрі Қайырбек Өскенбаев хабарлады.

«6 мамырда ақша Индустриялық даму қорына аударылады. Бұл «Бәйтерек» қорының акционерлік қоғамы. Қор өзі жұмыс істейтін банктермен келісім-шарт жасасуы керек. Осыдан кейін олар ақшаны «Бәйтерек» қорының банктеріне аударуы керек. Бір күн, екі-үш күн қанша уақыт кетеді, біз әр банкпен жеке жұмыс жасаймыз. Бірнеше банкпен келісім-шартымыз бар. Олармен келісім-шарт жасасып қойғанбыз, қазір пысықталуда» деді Өскенбаев үкімет отырысынан кейін журналистердің сұрақтарына жауап беріп.

Бес жыл ішінде бұрынғы утиль алым төлемі операторында 600 млрд теңгеге жуық қаражат жиналды, оның 100 млрд-ы жақын күндері қазақстандықтар үшін жеңілдетілген автонесие бағдарламасын іске қосуға жұмсалады деп уәде етілген.