Жеңілдетілген автокөлік несиесі алаяқтардың жаңа табысына айналды

Телефон алаяқтары қазақстандықтарға жеңілдетілген автонесие алуды ұсына бастады. Құқық қорғау органдары сақтыққа шақыруда.

Телефон әңгімесі  барысында олар өздерін банк немесе автосалон қызметкерлеріміз деп таныстырып, қысқа мерзімде іс-қағаздарын рәсімдеуге көмектесуге уәде береді, деп хабарлайды Elorda.info.

— Әңгімелесушінің психологиясын зерттей отырып, алаяқтар әртүрлі айла-шарғы қолдануы мүмкін және клиент өзінің жеке деректерін (банк деректемелері, шот нөмірлері, CVC кодтары) дереу айтуға келіспесе, көлік  уақытында рәсімделмеуі мүмкін деп қорқытады. Сондықтан біз азаматтардан сұраймыз. Сақ болыңыз және үшінші тұлғалармен сөйлескен кезде құпия жеке мәліметтерді айтпаңыз, - деді Нұр-Сұлтан қаласы Сарыарқа ауданының прокуроры Дәурен Дайыров.

Дәурен Дайыров  «ақпараттық жүйені пайдаланушыны» алдау немесе сеніміне қиянат жасау 4 жылға дейін бас бостандығынан айыру жазасына кесілетінін ескертті.

16 мамырда қазақстандық банктер жылына 4 пайызбен жеңілдетілген автонесие бере бастады. ҚР  Индустрия және инфрақрылымдық даму министрлігінің мәліметінше, бағдарлама іске қосылғаннан бері бір айға жуық уақыт ішінде 20 мың қазақстандық төмен мөлшерлемемен несиеге қызығушылық танытқан. Оның ішінде өтінімдердің жартысына жуығы мақұлданды, ал 3000 автокөлік жаңа иелеріне берілді.