Жазушы Медеу Сәрсеке өмірден озды

Семей полигонын зерттеуші, Сәтбаевты жоқтаушы, «Құрмет» орденінің иегері Медеу Сәрсеке қайтыс болды. Бұл туралы ақпаратты Дәулеткерей Кәпұлы растады, деп хабарлайды Orda.kz порталы.

«Медеу Сәрсеке ағамыз да мына жарық жалғаннан көшкен екен. Алдынан жарылқасын», - деп жазды Дәулеткерей Кәпұлы.

Медеу Сәрсеке Семей облысы, бұрынғы Абыралы ауданына қарасты Қайнар ауылында 1936 жылы 2 қаңтарда дүние есігін ашқан.

Өзінің еңбек жолын «Лениншіл жас» газетінде 1958-59 жылдарда әдеби қызметкер, бөлім меңгерушісі болып бастаған болатын. 

Инженер қаламгер төл әдебиетте өндіріс тақырыбының жаңа белеске көтерілуіне де үлес қосты.

«Ғажайып сәуле» (1959), «Көрінбестің көлеңкесі» (1960), «Жетінші толқын» (1964), «От және атом» (1965) повестері жас жеткіншектерге арналған. Өндіріс адамдары жайлы «Жеті жылдықтың жігіттері» очерктер кітабы (1961), «Қаз қайтқанда» (1968), «Айшықты мезет» (1969) деректі повестері жарияланды.

«Сәтбаев», «Ебіней Бөкетов» (2005) атты деректі ғұмырнамаларын (1980, 1989), «Шығыс хикаясы» пьесасын (1971), «Жаңғырық» (1979), «Көмбе» (1985) романдарын жазды. А.Беляевтің «Қос мекенді адам» романын қазақ тіліне аударған.