Жазушы Мақсат Тәж-Мұрат өмірден озды

Қазақ журналистикасы мен руханиятының көрнекті өкілі, терең білім мен талғамның иесі, әдебиеттанушы, эссеист, жазушы Мақсат Тәж-Мұрат 67 жасқа қараған шағында қайтыс болды, деп хабарлайды Orda.kz.

Мақсат Тәж-Мұрат — жаңашылдыққа ұмтылып, ескі сүрлеуге салынбай, уақытпен бірге дамып отыратын санаулы тұлғалардың бірі болатын.

Мақсат Тәж-Мұрат қазақ журналистикасының бірнеше буынына бағыт-бағдар берген ұстаз ретінде де белгілі. Ол кезінде «Астана» журналының орыстілді нұсқасын жандандырып, жас журналистерді жаңа ізденістерге жетелеген. Кейін Мәдениет ғылыми-зерттеу институтын басқарған жылдары да мәдени мұраның сақталуы мен ғылыми зерделенуіне айрықша үлес қосты.

Айта кету керек, Мақсат Тәж-мұрат 1959 жылы Атырау облысы Жылой ауданы Төлес ауылында туған. ҚазҰУ-ды бітірген. Республикалық баспасөз құралдарында жауапты қызмет атқарған. Әл-Фараби атындағы ҚазҰУ-дың доценті. «Ана тілі» ұлт апталығы газетінің бас редакторы болған.

Бірнеше кітаптың және мақалалардың авторы: «Шәңгерей: жасампаздық өмірі» (1998), «Батыс Алашорда: библиографиялык сөздік тәжірибесі» (2003). Алашорданың Батыс бөлімі туралы зерттеулер жүргізген. Алаш қайраткерлерінің өмірбаяндарын жазып шыққан.