«Жасыл даму» компаниясына жаңа басшы тағайындалды

Қазақстандағы утилалым операторы - Жасыл даму компаниясының басқарма төрағасы болып Ержан Сәрсенбай тағайындалды. Бұл туралы Экология, геология және табиғи ресурстар министрлігінің баспасөз қызметі мәлімдеді.

Ержан Сәрсенбай 2001 жылдың қарашасынан 2006 жылдың шілдесіне дейін Қаржы министрлігінде жетекші маманнан басқарма басшысына дейін қызмет атқарды.

2006 жылғы шілде мен 2007 жылғы сәуір аралығында Премьер-Министр Кеңсесінің Әлеуметтік-мәдени даму бөлімінің ғылым және инновациялық қызмет секторының меңгерушісі болды.

Бұрын хабарланғандай, Жанат Самат басқа жұмысқа ауысуына байланысты «Жасыл даму» басшысы қызметінен кетті. Еске салайық, Жанат Самат «Жасыл даму» компаниясын 2022 жылдың 1 ақпанында басқарды.

19 қаңтарда Үкімет «ӨКМ Операторы» ЖШС-не қатысты қаулы қабылдап, оны кәдеге жарату алымы үшін ақша жинау құқығынан айырды, сондай-ақ утилалым операторы қаражаты есебінен құрылған активтерді мемлекет меншігіне алды.