Жасөспірімдерге қатысты сексуалдық қылмыстардың жартысы «өзара келісіммен» жасалады – ІІМ

Ішкі істер вице-министрі Игорь Лепеханың айтуынша, жасөспірімдер арасындағы сексуалдық қылмыстардың жартысына жуығы өзара келісіммен жасалады, деп хабарлайды Orda.kz.

Ішкі істер министрлігінің мәліметінше, кәмелетке толмағандарға қатысты тіркелген сексуалдық қылмыстардың жартысы жасөспірімдердің өзара келісімімен жыныстық қатынасқа түсуіне байланысты. Вице-министр Игорь Лепеха, ерте жыныстық қатынастың негізгі себептері – отбасындағы қиын жағдай, жеткіліксіз тәрбие, бұқаралық ақпарат құралдарының еркін қарым-қатынасты насихаттауы, жасөспірімдердің девиантты мінез-құлқы және құқықтық сауатсыздық екенін жеткізді.

Сонымен қатар, ведомство 2024 жылы кәмелетке толмағандарға қатысты сексуалдық қылмыстар саны 14%-ға азайғанын хабарлады.

«Мұндай қылмыстардың жасырын сипатта болатынын және алдын алу қиын екенін атап өту қажет. Себебі олар көбіне тұрғын үйлерде, балаларға жақын адамдар тарапынан және өзара келісіммен жыныстық қатынасқа түсу нәтижесінде жасалады. Тіркелген қылмыстардың жартысына жуығы дәл осындай жағдайларға байланысты», – деді вице-министр Игорь Лепеха.