Жасөспірім өзіне бәліш алып берген адамның ақшасын қағып кетті

Астанада 14 жастағы жасөспірім бейтаныс жігіттен бәліш сатып алып беруді өтінген. Жанашыр азамат баланың қарны аш екен деп, келісіп, дүкенге ертіп апарып қалаған тоқашын сатып алып береді.  Бірақ ол сол баланың алдауына түсіп қалғанын өзі де білмей қалады.

Сатып алу кезінде бала қосымшаға кіретін құпия санды есіне сақтап, одан кейін ер адамнан шұғыл қоңырау шалу үшін телефонын сұраған.

«Ойында ештеңе жоқ аңғал азамат оған ұялы телефонын береді. Кәмелетке толмаған бала қосымшаға кіріп, досының картасына 122 мың теңге аударған. Аударым жасап, телефонды қайтарады. Ер адам ақшаның жоғалғанын келесі күні ғана біліп, полицияға жүгінген» деп нақтылады ҚР ІІМ.

Нәтижесінде жасөспірім ұсталды, белгілі болғандай, ол барлық ақшаны жұмсап үлгерген. Оның осыған ұқсас басқа да қылмыстарға қатысы бар-жоғы тексерілуде. Кәмелетке толмаған бала өз кінәсін мойындады, енді ол ювеналды полиция қызметкерлерінің ерекше бақылауында болады.