«Жас қызды зорлаған»: Алматы облысында 4 балаға шабуыл жасаған педофил сотталды

Алматы облысында үйге кіріп, 4 балаға шабуылдаған ер адамға сот үкімі шықты, деп хабарлайды Orda.kz. 

Еске салайық, 2024 жылғы 16 ақпанда Алматы облысының Жамбыл ауданында белгісіз ер адам үйге кіріп, ондағы төрт балаға шабуыл жасаған еді. Ол балаларды ұрып-соғып, байлап, тамағына пышақ тақаған.  Көршілер балалардың айқайынан шошып үйге келіп, күдіктіні ұстайды. Күдіктіні полицейлер әкетеді. Балалар ауруханаға жеткізілген болатын.

Содан кейін Алматы облысының прокуратурасы үш бап бойынша тергеу жүргізілетінін мәлімдеді (Кәмелетке толмаған екі және одан да көп балаларға қатысты бас бостандығынан заңсыз айыру, зорлық-зомбылық қолдану арқылы тұрғын үйге қол сұғылушылыққа бару, зорлау, яғни зорлық-зомбылық қолдану арқылы немесе оны жәбірленушіге немесе басқа адамдарға қолданамын деп қорқыту немесе жәбірленушінің дәрменсіз жағдайын пайдалану арқылы жыныстық қатынас, зорлау, яғни, жәбірленушіге немесе басқа адамдарға зорлық-зомбылық қолданумен немесе оны қолдану қаупімен не жәбірленушінің дәрменсіз жағдайын пайдалана отырып, бірнеше рет жасалған жыныстық қатынас). 

Алматы облысы Жамбыл ауданының прокуратурасы тергеу барысында ер адамның жас қызды зорлағанын анықтады. 

Сотталушыға қатысты сот процесі жабық өтті және бұл қылмыстың егжей - тегжейі жария етілмеді.