Жас ақын Асылан Қуанышұлының кітабының таныстырылымы өтті

8 қараша Алматы қаласында жас ақын Асылан Қуанышұлының кітабының таныстырылымы болды, деп хабарлайды Orda.kz. 

Кешке Қанағат Әбілқайыр, Ерлан Жүніс, Ырысбек Дәбей, Ерғали Бақаш, Мақсат Мәлік, Болат Жетекбай, Мақсұт Қосмамбетов сияқты танымал қаламгерлер келді. 

Кеш Ы.Дүкенұлы атындағы музыкалық аспаптар музейінде өтті.

Ақын «Steppe & world» баспасынан шыққан кітабын «Күнбатысқа қарай 2128 шақырым» деп атаған. Ол қазір тұрып жатқан Алматы қаласынан туған жері Маңғыстауға қарай тура 2128 шақырым болған соң алғашқы кітабын солай атағанын айтты.

Кітаптың алғы сөзін заманауи қазақ поэзиясының өкілі, Жазушылар одағының мүшесі Тоқтарәлі Таңжарық жазды. 
Бұл кітап Асылан Қуанышұлының тұңғыш өлеңдер жинағы. Оның өлеңдері қазақтың қара өлеңдерінен өзгеше, өзіндік нәзік иірімдер, жаңа образдар мен көркем штрихтармен көмкерілген. Кітап жыр сүйер қауымға арналған.