Жарылыстар туралы желіде жалған ақпарат таратқан адам ұсталды

Тараз түбіндегі жарылыс кезінде адамдардың дене мүшесі жұлынып кеткенін айтып, жалған ақпарат таратқан тараздық жігіт ұсталды.

Тараз түбіндегі жарылыстар туралы әлеуметтік желіде жалған ақпарат таратқан ол сөзінің жалған екенін мойындап кешірім сұрады.

27 тамыз күні  полиция қызметкерлері инстаграм желісіне мониторинг жүргізу кезінде Байзақ ауданында орналасқан әскери бөлім аумағында болған жарылыстарды жоюға болмайтынын және оның күші жойқын екенін айтқан бейнежазбаны анықтады.  

Бұл туралы  Orda.kz порталы  Хабар 24.-ке сілтеме жасап хабарлады.

Жалған ақпарат таратқан Тараз қаласының 26 жасар тұрғыны екені белгілі болды.  Атпалдай азамат еш ойланбастан зардап шеккендердің қатарында дене бөліктері жұлынған құрбандар да бар екенін айтып, жалған хабар таратқан.

Ұсталған соң ол өз ісіне өкінетінін айтып, анықталмаған ақпарат салғаны үшін елден кешірім сұрады.

Еске салсақ, Жамбыл облысындағы әскери бөлімде болған жарылыстан 13 адам қайтыс болды. Қаза тапқандардың ішінде әскерилер, құтқарушылар және әскери прокуратура қызметкерлері бар.