Жарылыс аймағында такси құны 35 теңгеге жеткен

Тараз маңындағы жарылыстан кейін такси жүргізушілері бағаларын үш есе көтеріп, бір көліктің құнын 35 мың теңгеге бағалаған.

Жарылыс аймағынан қашып, үй-жайларын тастап бас сауғалаған халықтан кейбір такси жүргізушілері үш есе өскен баға сұраған.

Бұл туралы  Orda.kz  порталы Еуразия бірінші арнасына сілтеме жасап хабарлайды.  

Зейнеткер Зализа Жураева сол кешті қорқынышпен еске алады. Жарылыстан үйлердің терезелері сынып, бала-шаға шошып қалған.  Сондықтан зейнеткердің отбасы бірден басқа жаққа кетпекші болады.

— Біз қашып келе жаттық. Жарылыстар болып жатты, бірақ біз өрттен 12 шақырым қашықта болдық. Бар ақшамызды таксистерге бердік. Бүгін қайтайын десек, қалай қайтарымызды білмей отырмыз. Зейнетақы әлі түскен жоқ, – деді Байзақ ауылының тұрғыны.

Жол бойында шақырымға созылатын кептеліс пайда болып, көлік қатынасы қиындап кеткен кезде халыққа көмек қолын созудың орнына кейбір пысықайлар ақша табуды көздеген.

— Дүрбелең болды. Бағаны кім қалай қойғысы келсе, солай қойды. Баға жоғарылап, адамдар шағымдана бастады. Таңертең келсек, бір көлікке отыз, отыз бес мың сұрап тұр. Бұрын он мың теңгеге жүретінбіз. Бұл біз үшін ұят, – дейді жүргізуші Нұрбек Бексұлтанов.

Дегенмен адамгершілігін жоғалтпаған жандар да баршылық. Олар тұрғындарды барар жеріне тегін апарып жатты. Кейбіреулер тіпті халыққа қызмет ету үшін басқа қалалардан да келген.  Аурухана алдын күзетіп, бейтаныс адамдарға көмектесуге тырысып, жүгіріп жүрген қайырымды жандар да көптеп табылған.