Жарты жыл іздеуде жүрген адам пойызда ұсталды

Шығыс Қазақстан облысында жарты жыл іздеуде жүрген сотталған адам ұсталды, деп хабарлайды ORDA.kz тілшісі.

6 айдан астам уақыт бойы іздеуде жүрген сотталған адамды пробация қызметкерлері мен Көкпекті ауданының полиция бөлімі бірлесіп қолға түсірді.

Алаяқтық қылмысы үшін 3 жыл 6 айға бас бостандығынан айрылыған 20 жасар жігіт, сот үкімі заңды күшіне енгеннен кейін пробация қызметіне есепке тұруға келмей қойған. Осыдан кейін оған іздеу жарияланды.

— Ер адам «Алматы-Өскемен» пойызында ұсталды. Қазіргі уақытта уақытша ұстау абақтысына қамауға алынған. Енді ол 3 жарым жыл мерзімге бас бостандығынан айрылуы мүмкін, - деді әділет аға лейтенанты Марат Төлепбергенов.

Естеріңізге сала кетейік, 15-24 наурыз аралығында ШҚО- да «Пробация» жедел алдын алу шарасы өткізілуде. Мұндағы мақсат – құқық бұзушылықтар мен қайталама қылмыстардың алдын алу.