Жаркенттегі офицер қазасына қатысты төрт күдікті ұсталды

Бұл туралы Құрлық әскерлері қолбасшысының орынбасары мәлімдеді, деп хабарлайды Orda.kz ҚазАқпаратқа сілтеме жасап.

Кеше марқұм капитан Дархан Дәулетті ақтық сапарға шығарып салды. Офицер Жетісу өңіріндегі Жаркент гарнизонының 74261 әскери бөлімінде қаза тапты.

Алайда туыстары офицердің кісі қолынан қаза тапқанына сенімді.

Марқұмды жуған ағасы оның қатты соққыға жығылғанын, қолы мен аяқтарында арқан іздері, бас сүйегінде сызат барын айтты.

«Біз бауырымның ісіне қатысы бар адамдардан заң алдында жауап беруін сұраймыз және талап етеміз. Бүгін жерлеуге жоғары шенді генералдар мен депутаттар қатысты. Олар кешірім сұрады. Генерал бұл істі әділ тексеріп, кінәлілерді жазалауға уәде берді. Бірақ қандай бап бойынша іс қозғалып жатқанын білмейміз», - деп бөлісті марқұмның ағасы. 

Жерлеуге қатысқан Қорғаныс министрлігінің өкілдері офицер қайтыс болған күні әскери бөлімде жоспардан тыс оқу-жаттығу өткенін растады, бірақ олар оқиғаның егжей-тегжейін айтудан бас тартты.

«Оқиғаға байланысты әскери бөлімге комиссия жіберілді. Іс қозғалды. Ішкі істер министрлігі тергеу жүргізіп жатыр. Оқиға әскери бөлімнің ішінде болған. Төрт күдікті ұсталып, уақытша ұстау абақтысына қамалды. Сол күні жеке жоспар бойынша оқу-жаттығулар өткенін растаймын», - деді Құрлық әскерлері қолбасшысының орынбасары, полковник Арынғали Ақышев. 

Марқұм Дәулет Дархан 26 жаста еді. Құрлық әскерлерінің Әскери институтын үздік бітіре салысымен Отар әскери гарнизонына қызметке кірісті. Араға бес жыл салып, Жаркент қаласындағы 74261 әскери бөлімінің инженерлік қызмет бастығы лауазымына дейін көтерілген болатын.