Жаркентте мектеп дәретханасын салуға ата-аналардан ақша жиналды

Instagram парақшалардың бірінде Алматы облысы Панфилов ауданында мектеп дәретханасын салуға ата-аналардан ақша жиналып жатқаны туралы хабарлама жарияланды. Жауапты органдар оқиғаға қатысты түсініктеме берді.

Әлеуметтік желіде жарияланған видеода мектеп дәретханасы түсіріліп, қандай нөмірге ақша аудару керектігі жазылған.

«Мынау не деген сұмдық? Мектепке кафельді халыққа ақша жиналып салдыруда. Сонда бұған ақша бөлінбей ме? Бұл қалай? Президентіміздің тапсырмасымен қазір барлық жерлерде мектеп дәретханасы іште орналасу керек. Министр мырза мынау не деген сөз? Тексерулеріңізді сұраймыз!» делінген жазбада.

Алайда, Панфилов ауданы әкімдігінің өкілдері ата-аналар дәретхананы өз бастамаларымен салып жатқанын түсіндірді.

«Мектеп екі корпустан тұрады. Бір корпусында ғана ішкі әжетхана бар. Екінші корпуста әжетхана жоқ. Ата-аналар өз бастамаларымен ішке әжетхана салғызып жатыр. Қаржы жетпей ата-аналар демеуші іздеген. Қазір құрылыс жұмысы 90 пайыз аяқталған. Өздері аяқтайтынын айтты» деп әкімдік өкілдері жауап берді.

Айта кетсек, ҚР Білім және ғылым министрлігі мектептерге сырттағы дәретханаларға байланысты мәселелерді шешу, бейнебақылау камераларын, дабыл түймелерін және қауіпсіздік жүйелерінің басқа элементтерімен қамтамасыз ету қажеттілігі туралы ескерту жасаған.