Жаркентте баласын байлап сабаған әйелдің психоневрологиялық есепте тұрғаны анықталды

Жетісу облысының Жаркент қаласында өз баласын аяусыз соққыға жыққан әйелдің диспансерлік есепте тұрғаны белгілі болды, деп хабарлайды Orda.kz.

Баласын байлап қойып,аяусыз соққан әйел 28 жаста, ал оның күйеуі 30 жаста. Ерлі-зайыптының екеуі де Жаркент қаласындағы №4 арнайы облыстық мектеп-интернатта тәрбиеленген. Әйел ата-анасынан ерте айырылған, ал күйеуі ата-анасының қамқорлығынсыз өскен.

«Ерлі-зайыптының жеңіл дәрежедегі ақыл-ой кемістігі мен зерде бұзылысы диагнозы бар. Олар психоневрологиялық диспансерлік есепте тұрады. 18 қаңтар күні сағат 23:30 шамасында бұл отбасы полиция қызметкерлерінің көмегімен Отбасын қолдау орталығына жеткізілді. Балалар медициналық тексеруден өтті, ал анасы полиция бөлімшесіне қалдырылды»,  деп хабарлады қалалық әкімдік.

Жергілікті әкімдік өкілдері балалардың әкесімен психологиялық тұрғыда әңгімелесіп, бүлдіршіндерге арналған сергіту және дамыту ойындар ұйымдастырды. 4 және 2 жастағы бүлдіршіндер қазіргі уақытта Жаркенттегі «Жанұя» отбасын қолдау орталығына орналастырылған.

«Балалардың бойынан қорқыныш немесе үрей байқалған жоқ, олар бірден ойнап кетті. Анасының қасында өздерін қалай ұстайтыны бізге белгісіз, бірақ орталыққа келгенде олар ешқандай ерекше мінез-құлық көрсетпеді», – деді орталық мамандары.

Жетісу облыстық полиция департаментінің мәліметінше, әйелдің жеке басы бірден анықталып, ол уақытша тергеу изоляторына қамалды. Әйелге қатысты қылмыстық іс қозғалды.

«Аталған дерек бойынша қылмыстық іс қозғалды. Күдікті қажетті тергеу әрекеттерін жүргізу үшін полиция бөліміне жеткізіліп, уақытша ұстау изоляторына қамалды. Қорғаншылық және қамқоршылық органына анасын ата-ана құқығынан айыру мәселесін қарастыру туралы тиісті ұсыныс жолданады»,  деп мәлімдеді Жетісу облыстық полиция департаменті.

Балалар құқықтарын қорғау комитеті де бұл жағдайды ерекше бақылауда ұстап отырғанын жеткізді.

Еске сала кетейік, 19 қаңтарда Жаркентте 28 жастағы әйелдің өз баласын жылыту батареясына байлап, аяусыз ұрып жатқан бейнежазбасы желіде тарады.