«Жарақаттан ба, әлде жанжалдан ба?»: Жанқоштың жекпе-жегі болмайтын болды

Қазақстандық танымал боксшы Жанқош Тұраров Алматы Аренада 28 қыркүйекте өтетін жекпе-жегіне қатыспайды, деп хабарлайды Orda.kz.

Жанқош Тұраровтың айтуынша, мұның себебі – жаттығу кезінде алған жарақаты. 

«Ассалаумағалейкум, достар! 28-қыркүйекке жоспарланған жекпе-жегім оң жақ иығымнан жаттығу барысында жарақат алуыма байланысты кейінге қалдырылды. Қай уақытта болатынын алдағы уақытта хабарлаймын» деп жазды боксшы өзінің instagram парақшасында.

Тамыз айында боксшының басы дауға қалған болатын. 21 тамызда Алматы полициясы спортшыға қатысты зорлау айыбы бойынша қылмыстық іс қозғағаны белгілі болды. Жанқош бұл айыптарды түбегейлі жоққа шығарып, жалған деп атады. Алайда оның «Төсектес қыз керек болса, маған зорламай-ақ келетін жағдайым бар!» деген сөздерін жұрт талқылаған болатын.

Тұраровтың жұбайы да оны қолдап, «бәрі жақсы, танымал адамдар туралы не айтылмайды» деп қауесетке сенбеуге шақырды.

26 тамызда боксшы өзіне тағылған айыптар бойынша маңызды мәлімдеме жасады. Алайда оның мән-жайы әзірге ашылмады.

Спортшы өзінің Instagram парақшасына адвокаты Самат Мамұтовтың баспасөз конференциясы бейнежазбасын салды.

«Қылмыстық іс ҚР ҚК 120-бабы, 1-бөлігі (зорлау) бойынша қозғалды. Жанқош Тұраров күдікті деп танылған жоқ, ол қазір қорғануға құқығы бар куәгер мәртебесінде тұр, бұл – қалыпты процедура. Егер зардап шегуші немесе куәгерлер біреуді нұсқайтын болса, ол қорғануға құқығы бар куәгер мәртебесін алады, сондықтан Жанқош Тұраров қазіргі уақытта осы мәртебеде. Оған қатысты бұлтартпау шарасы қолданылған жоқ, сотқа дейінгі тергеу органдарына келу міндеттемесі бар», – деді Самат Мамұтов Жанқош Тұраров жариялаған бейнежазбада.

Ал спортшы бәрін жоққа шығарып, алып-қашпа сөзден шаршағанын айтты.

«Лас, алып-қашпа сөздер шаршатты. Арызданушымен төсек қатынасы тұрмақ, ешқандай қарым-қатынас та болған емес!» деп жазды Жанқош Тұраров.