Жапония Ресейге қарсы санкцияларын кеңейтпек

Аталған кеңейту  жұмыстары жеке тұлғалардың, ұйымдардың және ресейлік қаржы институттарының активтерін бұғаттау бағытында жоспарлануда.

Жапония үкіметі Ресейге қарсы санкцияларды кеңейту туралы шешім қабылдады. Бұл туралы Жапония премьер-министрі Фумио Кишида мәлімдеді. ТАСС жаңа санкциялар жеке тұлғалардың, ұйымдардың және ресейлік қаржы институттарының активтеріне тыйым салуды көздейді деп жазады. Экспортқа тыйым салынатын заттардың тізімі де көбейеді, оның ішінде дрондар да бар. Алдағы күндері нақты тізім шығады деп күтілуде.

Айтпақшы, Америка Құрама Штаттарының әкімшілігі ресейлік банк секторының 80% -ына қарсы санкциялар енгізді, 2,4 мыңға жуық жеке және заңды тұлғалар американдық шектеулерге ұшырады. 24 ақпанда АҚШ Мемлекеттік департаменті Ресейдің ондаған облыс басшылары мен тоғыз министріне қарсы жаңа санкциялар жариялады.

Сол күні Канада 129 ресейлікке, оның ішінде үкімет мүшелеріне, әскерилерге, әскери-өнеркәсіп кешені өкілдеріне, сондай-ақ 63 заңды тұлғаға санкция салатынын хабарлады. Сонымен қатар, Оттава электроника өндірісінде қолданылатын кейбір химиялық заттарды Ресейге экспорттауға тыйым салды.

Қазірдің өзінде қолданыстағы жапондық санкциялар Ресейдегі 900-ден астам адам мен 50-ден астам ұйымға әсер ететіні белгілі. Жапония «Альфа-Банк», «ВТБ», «ВЕБ.РФ», «Новикомбанк», «Открытие банк», «Промсвязьбанк», «Россия банкі», «Сбербанк», «Совкомбанк», сондай-ақ 40-қа жуық басқа ұйымдар мен компаниялардың активтерін бұғаттады. Сондай-ақ елде экспортқа тыйым салынған тауарлар мен технологиялардың тізбесі бекітілді, онда қазірдің өзінде 500-ге жуық атау енгізілген. Оның ішінде жартылай өткізгіштер, байланыс құралдары, бағдарламалық қамтамасыз ету, мұнай өңдеу жабдықтары, жүк көліктері мен станоктар бар.

Сонымен қатар, Ресей Федерациясына сәнді тауарларды жеткізуге және Ресейден алтын әкелуге эмбарго енгізілді. Сондай-ақ кейбір химиялық заттарды, соның ішінде хлор, метанол, ацетон, этилен және натрий гипохлоритін Ресейге экспорттауға тыйым салынады.