Жапониядағы ХХХІІ Жазғы олимпиада ойындары аяқталды

Әлемнің барлық елінен таңдаулы спортшылардың басын қосқан дүбірлі дода - Жапониядағы жазғы Олимпиада ойындары бүгін мәресіне жетті.

Төртжылдықтың басты бәсекесінде Қазақстан 83-орыннан ғана көріне алды. Бұл Қазақстан спорт тарихындағы ең бір төменгі нәтиже көрсеткен ойын болды.

Шілденің 23-нен бастау алған  сайыста АҚШ алда келе жатыр. Ол қазір 38 алтын, 39 күміс және 33 қоламен жалпы есепте бірінші орынға шықты.

38 алтын, 31 күміс, 18 қола медалімен Қытай 2-ші орынға табан тіреді.

Жарыстың қожайыны Жапония болса, 27 алтын, 12 күміс және 17 қола медальмен үздік үштіктің қатарынан көрінді.

Ал Қазақстан құрамасы осы жолы бірде бір алтын немесе күміс медальға қол жеткізе алмады. Отандық спортшыларымыз  8 қола жүлдені місе тұтты.

Қола жүлдемен  елге оралғандар -  дзюдошы Елдос Сметов, зіл теміршілер Игорь Сон мен Зульфия Чиншанло, былғары қолғап шеберлері Қамшыбек Қоңқабаев пен Сәкен Бибосынов, палуан Нұрислам Санаев және қос каратеші Дархан Исадилов пен Софья Берульцева.

Токио Олимпиадасының жабылу салтанаты бүгін Нұр-Сұлтан уақытымен сағат 17:00-де өтеді.