Жапония премьер-министрі сайлауда ұйықтап қалды

Жапонияның саяси сахнасында күтпеген жағдай болды. Үкімет құрамының қайта сайлануында премьер-министр Сигеру Ишиба дәл жиынның ортасында ұйқыға кетті, деп хабарлайды Orda.kz.

Парламенттің өкілдер палатасының алғашқы отырысында премьер-министрді сайлау басталғанда Ишиба көзін жұмып, бірнеше минут бойы басын төмен иіп отырды. Оның осы жағдайына кабинеттің бас хатшысы мен министрлер біраз абдырап қарап отырды.

Әлеуметтік желілерде бұл оқиға тез таралды. Жапонияның инновациялар партиясының жетекшісі Нобуюки Баба ашық сын айтты.

«Бұл — сайлау, мұндай кезде ұйықтау орынсыз!» — деп, қоғамға ой салды.

Twitter-де таралған видеода премьер-министрдің басы салбырап, терең ұйқыға кеткені анық көрінеді.

Жапония парламентінің төменгі палатасы 11 қараша күні Сигеру Ишибаны қайтадан премьер-министр етіп сайлады. Бірінші турда 221 дауыс жинаған Ишиба өз орнын сақтап қалды. Осыдан кейін үкімет толығымен отставкаға кетіп, жаңа құрамды анықтау үшін қайта жасақтау жұмыстары басталды.