Жанжалды «арбаушы» Алекс Лесли Қазақстан жерін баса алмады

Өзін керемет «арбаушы» деп жариялаған Алекс Лесли есімімен танымал ресейлік алаяқ  Александр Кириллов Қазақстанға келіп «қыз-келіншектерді» арбаймын деген арманына жете алмай, жалған ақпарат таратып, сайқымазаққа айналып отыр.

Алдымен осы «пикапер» сөзін түсініп алайықшы. Бұл ағылшынның Pick Up Artist (PUA) сөзінен шыққан. Тікелей қазақшаға аударсақ – «арбаушы» (кейде  - жолдаушы.ред) деген мағынаны білдіреді.

Ал енді бұл сөздің мағынасын ғаламтордан іздесек: «Пикапер - бұл қыз-келіншектермен қарым-қатынас, арбау, алдау, әйелдерді өзіне тарту және әйелдермен танысу өнерін зерттейтін жігіт немесе еркек» деген түсініктеме аламыз. Яғни, бір сөзбен айтқанда «алаяқ», қыз-келіншектердің көз жасына қалатын сұмырай, өйткені ондай адамдар бұны тек ойын немесе ермек ретінде көреді.

Қош делік, сөйтіп, осы сөзді зерттеуге түрткі болған Алекс Лесли есімімен танымал ресейлік алаяқ  Александр Кириллов Instagram желісіндегі парақшасында Алматыға ұшып келе жатқанын, паспорттық бақылаудан өткенін айтты. Бірақ ол жалған болып шықты.

Оның әуежайда жүргені туралы видеолар, сондай-ақ «қазақ қыздарын аңдушының» қалада пәтер жалдағаны туралы ақпараттар толып жатыр. Бұл туралы Orda.kz сайтына ақпарат көздері хабарлады.

Айтпақшы, оны  әуежайда 25-30 шақты наразы қазақстандықтар  күтіп тұрды. Олардың барлығы осы «азғынды»  елге кіргізбеуді сұрап, желілік полиция бөліміне арыз жазған. Қандары бастарына шапқан күтіп алушылар оның келмегеніне көз жеткізген соң естелік суретке түсіп, үйлеріне қайтты.

Еске салайық, Алекс Лесли деген атпен танымал ресейлік «арбаушы» Александр Кириллов әлеуметтік желілерде Қазақстанда өзінің «арбау-алдау» бойынша жаттығуы туралы хабарландыру жариялады. Оның айтуынша, ол өзінің «қазақтар үшін» жорығын жариялауға шешім қабылдаған.

Осыдан кейін ҚР Сыртқы істер министрлігі «арбаушы»  Алекс Леслидің әрекетін зерттейтінін, ал ҚР Ішкі істер министрлігі ер адамның Қазақстанға кіруіне тыйым салынғанын хабарлаған болатын.