Жанжалдан соң күйеуі жындыханаға апарып тастаған әйел қылмыстық іс қозғады

Түркістан облысында күйеуі заңсыз бас бостандығынан айырып, жындыханаға апарып тастаған әйел қылмыстық істі қайта қозғады, деп хабарлайды Orda.kz.

Бұл жөнінде ҚР Адам құқықтары жөніндегі уәкіл мәлімдеді. Арызданушы әйелге Түркістан облысы бойынша адам құқықтары жөніндегі омбудсмен қол ұшын созыпты. Отбасындағы жанжалдан кейін күйеуі мен оның екі досы оны байлап, Шымкенттегі психикалық денсаулық орталығына алып барғанын айтты. 

Оның айтуынша, күйеуі орталық қызметкерлерімен алдын ала келісіп, оны психикалық ауытқуы бар адам ретінде орналастырған. Әйел осы мекемеде 3 күн болған. 

Сонымен қатар, әйел орталықтағы қызметкерлердің заңсыз әрекеттері туралы да хабарлады. 

Ол Түркістан қалалық полиция басқармасына арыз жазғанын, онда басында қылмыстық іс қозғалғанымен, 2024 жылдың тамызында іс жабылғанын мәлімдеді. 

«Омбудсмен өкілі арызданушыға құқығы мен бостандығын қорғау үшін қолдануға болатын тәсілдер мен құралдарды түсіндірді. Қазіргі таңда Түркістан қаласының прокуратурасы қылмыстық істі тоқтату туралы қаулының күшін жойып, қылмыстық істі қайта қозғады», деп мәлімдеді ҚР Адам құқықтары жөніндегі омбудсмен.