Жанжалдан кейінгі бірінші чемпионат: Қазақстанның атынан кім шығады

Бүгін Өзбекстан астанасы Ташкентте ауыр атлетикадан әлем чемпионаты басталды. Чемпионат 7-17 желтоқсан аралығында өтеді.

Ауыр атлетика федерациясының мәліметінше, бұл әлем чемпионатында Қазақстан намысын төрт спортшы қорғайды

• 55 келі салмақта Универсиаданың қола жүлдегері (2017), Әлем чемпионатының күміс жүлдегері (2018), Азия чемпионы (2020) Арли Чаонтей өнер көрсетеді.
• 96 келіге дейінгі салмақта Қазақстан намысын Азия чемпионатының қола жүлдегері Артем Антропов қорғайды.
• 81 келіге дейінгі салмақта Азия чемпионатының күміс жүлдегері Карина Құзғанбаева өнер көрсетсе, 87+ санатында Айзада Муптилда бақ сынайды.

Еске салсақ, қараша айында Қазақстанның ауыр атлетикадан жаңа бас бапкері мен спорт омбудсмені тағайындалған болатын.

Ауыр атлетикадан Қазақстан ұлттық құрамасының бас бапкері болып Дәурен Бекмұханбетов сайланды.

Альберт Линдердің өлімі және ауыр атлетикадағы жанжал

Еске салсақ, Альберт Линдердің өлімі және одан кейінгі оқиғалар тізбегі қазақстандық ауыр атлетика төңірегіндегі жағдайға өзгерістер әкелді. Күрделі шараларды қабылдаудың шешуші себебі спортшылардың, бапкерлердің, сондай-ақ Альберт Линдердің туыстарының көптеген өтініштері болды.

Министрдің араласуынан кейін жаттықтырушылар штабының өрескел бұзушылықтары анықталып, ұлттық құраманың бас бапкері Бақыт Ахметов, бас бапкер Сергей Седов және басқалар қызметінен босатылған.