Жансақтау бөлімінде жатқан сарбазды анасына неге көрсетпейді?

№12 орталық қалалық клиникалық аурухана басшылығы жансақтау бөлімінде жатқан Ербаян Мұхтарды анасы Гүлсім Қамиеваға көрсетпей қойды.

Бұл туралы заңгер Инга Иманбай өзінің Facеbook парақшасында хабарлады.

Анасы наразылық білдіріп, баласын көрмек болғанда аурухана қызметкерлері полиция шақыртты. 

«Комада жатқан солдат Ербаян Мұхтардың анасын ауруханаға кіргізбей, баласын көрсетпей, емхана басшылығы анасына, ағасына шағымданып, полиция шақырып жатыр. Ұлы өмір мен өлімнің ортасында жатқан, әділдік іздеген анаға сонша қиянат көрсететіндей не болды? Оған ұлын неге көрсетпей жатыр?» деп жазды Инга Иманбай.

Естеріңізге сала кетейік, Бауыржан Момышұлы атындағы 5571 әскери бөлімінде әскери борышын өтеп жүрген Ербаян Мұхтар өткен жылдың желтоқсан айынан бастап жансақтау бөліміне түсті.

Отбасына Ербаян әжетханада жығылып, басын плиткаға соқты деп хабарлаған. Туыстары бұған келіспейді. Олардың айтуынша, Ербаян түнгі екіде жарақат алған, сол кезде оның жанында кемінде жеті адам болған.

 №12 қалалық клиникалық ауруханаға жатқанына он екі күн толғанда Ербаян есін жиып, ата-анасына өзін соққыға жыққанын ым-ишарамен жеткізген. Мұны білген әскерилер жақындарына ескертпестен, оны әскери госпитальға жеткізіп, шұғыл түрде ота жасады. Анасына ота бастың артқы жағындағы іріңді кетіру үшін қажет екенін айтқан. Бірақ Гүлсім Қамиеваның айтуынша, ұлының миының бір бөлігін алып тастаған. Операциядан кейін ол қайтадан комаға түсті. Қазір аурухана басшылығы полиция шақырып, баласын анасына көрсетпей отыр.

Ескерте кететін жайт, 2022 жылдың тамыз айында дәл осы бөлімшеде Алмас Шахимов қайтыс болды.