Жанқош Тұраровқа қатысты қылмыстық іс тоқтатылды

Бұған дейін Алматы қаласы Әуезов аудандық полиция басқармасы Қазақстан Республикасы Қылмыстық кодексінің 120-бабы, 1-бөлігі бойынша қылмыстық істі тергеп жатқанын хабарлаған болатын. Істің басты кейіпкері IBO нұсқасы бойынша бірінші жартылай орта салмақтағы әлем чемпионы, белгілі қазақстандық боксшы Жанқош Тұраров, деп хабарлайды Orda.kz.

«Сот-медициналық және сот-биологиялық сараптамалары жүргізілді. Олардың нәтижесінде зорлау фактісі расталмады», — деді полиция басқармасы.

20 қазанда Қазақстан Республикасы Қылмыстық-процестік кодексінің 35-бабы, 1-бөлігі, 2-тармағына (қылмыстық құқықбұзушылық құрамының болмауына байланысты қылмыстық істі тоқтату) сәйкес, сотқа дейінгі тергеуді тоқтату туралы шешім қабылданды. Бұл шешіммен Алматы қаласы Әуезов ауданының прокуратурасы да келісті.

Еске сала кетейік, қылмыстық іс қозғалғаннан кейін Жанқош Тұраров өзінің Instagram парақшасында мәлімдеме жасап, өзіне жала жабылғанын айтқан болатын.