Жангелдин ауданының атауын өзгерту керек – депутат

Мәжіліс депутаты Қазыбек Иса Қостанай облысындағы Жангелдин ауданының атын өзгерту бастамасын көтерді.

Еуразия арнасының хабарлауынша, депутат қазақты сатқан адамның атына ауданды атау ақылға қонымсыз екенін айтты. Ол бұл ауданның атауын Ахмет Байтұрсынұлының атына өзгертуге ұсыныс жасады.

«Алаш көсемдері Ахмет пен Міржақыптың туған ауданының аты әлі күнге дейін қызыл большевик, кезінде ұлты мен дінін сатып кеткен Николай Степнов болған Әліби Жангелдиннің атында болуы елге де, ерге де, және де ең алдымен әруаққа қиянат» деді Қазыбек Иса.

Айта кетсек, 1950 жылы Қостанай облысындағы Торғай ауданы Жангелдин атауын алған. Орталығы – Торғай ауылы. 2019 жылғы санақ бойынша мұнда 12 251 адам тұрады.

Депутаттың айтуынша, жергілікті халық бұған дейін осындай ұсыныспен президентке хат жазған.