Жаңаөзенге жұмысшылар ереуілінен кейін келген арнайы топ «Өзенмұнайгаз» компаниясының жұмысшыларымен кездесті

Жиын барысында «Өзенмұнайгаз» компаниясының бас директоры Нұрдәулет Қилыбай жұмыс тобы өрескел заңбұзушылықтарды анықтайтын болса, кәсіпорында кадрлық өзгерістер жүргізілетінін атап өтті.

Жұмыс тобы мүшелері химияландыру және экология бөлімінде, сондай-ақ мұнай айдау бөлімінде болды. Қызметкерлер кадр мәселесі мен техникалық қондырғыларды жаңарту қажеттілігі туралы айтты.

«ҚазМұнайГаз» өкілдері жұмыс жағдайын жақсарту және «Өзенмұнайгаз» АҚ инфрақұрылымын жаңарту үшін қажетті өзгерістер енгізуге дайын екендіктерін атап өтті.

Жұмыс тобының жетекшісі, «ҚазМұнайГаз» АҚ басқарма төрағасының орынбасары Дәулетжан Хасанов Жаңаөзен қаласында орналасқан «БерӘлі Маңғыстау» компаниясының бұрынғы жұмысшыларымен кездесті. Кәсіпорын бұрынғы жұмысшыларына жалақысын, әлеуметтік пакетін сақтай отырып, әрі қарай ұзақ мерзімді еңбек шартын жасасу арқылы жұмысқа орналастыруды ұсынды.

«Өзенмұнайгаздың» қызметін тексеру бірнеше аптаға созылады. Сондай-ақ жұмыс тобы 67 мұнай өндіруші және мұнай кәсіпшілігіне қызмет көрсету ұйымдарының ұжымдарымен кездесуі жоспарланған.

Сәуірдің 21-і күні «Өзенмұнайгаз» бен мердігерлер 248 миллион теңгені жымқырды деген күдікке ілінгені белгілі болды.