Жаңаөзенде тағы да жұмыспен қамту мәселесі  талқыланды

«ҚазМұнайГаздың» жұмыс тобы жергілікті 30 кәсіпкермен кездесу өткізді.

Шараға «ҚазМұнайГаз» ҰК АҚ басқарма төрағасының орынбасары Д.Хасанов, «Өзенмұнайгаз» АҚ бас директоры Н.Қилыбай, «Атамекен» Кәсіпкерлер палатасының Жаңаөзендегі директоры А.Шарапатдинов, жергілікті атқарушы орган өкілдері, сондай-ақ мәслихат депутаттары қатысты.

Талқыланған өзекті мәселе Жаңаөзендегі бірқатар тауарлар мен қызметтерді өндіруді оқшаулау болды.

Жиын барысында «Өзенмұнайгаз» кәсіпорнының сатып алу қызметінде болашақта отандық тауар өндірушілердің жеткізу мүмкіндігіне жол ашатын орындар бар екені белгілі болды.

Мұндай шара өңірдегі жұмыспен қамту мәселесін шешуге, жергілікті қамтуды дамытуға септігін тигізеді, дейді мамандар.

Қазірдің өзінде арматура өндеу, шыны талшықты құбырларды жөндеу, гидравликалық қысқышты жалға алу және металл сынықтарын радиациядан тазарту сияқты қызметтерді оқшаулау жобалары қолға алынуда.

Айтпақшы, кездесуге қатысушылар ағымдағы қажеттіліктерді анықтайтын және тиісті ұсыныстарды қарастыратын арнайы шағын топ құруды ұйғарды.

Бұл мәселе бойынша келесі отырыс 10 маусымға жоспарланған.

Еске салайық, бұған дейін Жаңаөзен қаласының «Өзенмұнайгаз» және мердігер ұйымдарында заң бұзушылықтар анықталғаны хабарланған болатын.