Жанғалы ауданында жүкті әйел көз жұмды

15 мамырда БҚО-ың Жанғалы аудандық ауруханасында жүкті әйел көз жұмды. Үш баланың анасы, 36 жастағы Индира Тәкесова өз бетімен босануға келген, бірақ ауруханадан тірі шықпаған. Өкінішке қарай ана да, бала да  қайтыс болды. 

Бұл туралы БҚО ІІД баспасөз қызметі хабарлады.

Индира Тәкесованың өліміне қатысты Қылмыстық кодекстің 317-бабы бойынша сотқа дейінгі тергеу басталды. Атап айтсақ, «Медицина қызметкерінің кәсіби міндеттерін тиісінше орындамауы, абайсызда адам өліміне әкеп соғуы» бойынша іс қозғалды.

Марқұмның жұбайының айтуынша, өлім себебі әлі белгісіз. Сот-медициналық сараптама қорытындысы бір айдың ішінде дайын болады. Алайда, ер адам әйелінің өліміне адами фактор себеп болғанына сенімді және әділдікке жетіп, кінәлілерді жазалауға бел буып отыр.

Айта кетейік, бұл дәл осы ауруханадағы жүкті әйелдің бірінші өлімі емес. 2018 жылы жүктілігі 29 апталық 44 жастағы Бибінұр Негметова қансырап ауруханаға жеткізіліп, көп ұзамай операция үстелінде көз жұмған болатын.