Жаңа жыл қарсаңында 3 мыңнан астам құтқарушы кезекшілік етеді

Төтенше жағдайлар министрлігінің бөлімшелері жаңа жылдық мерекелер кезінде күшейтілген қызмет көрсету режиміне көшірілді.

«ҚР Төтенше жағдайлар министрлігінің күштері мен құралдарының мереке және демалыс күндері болуы мүмкін төтенше жағдайлар мен оқыс оқиғаларға жедел ден қоюға әзірлігін қамтамасыз ету мақсатында Қазақстан Республикасы Төтенше жағдайлар министрлігінің бөлімшелері күшейтілген режимге көшірілді. Төтенше жағдайлар министрлігінің барлық авариялық-құтқару жасағы күшейтілген режимде, ал олардың 3 мыңнан астамы жедел әрекет етуге әзірлікте тікелей қызметте болады»  деп хабарлады ведомствоның баспасөз қызметі.

Анықталғандай, өрт сөндіру және авариялық-құтқару жұмыстары қызметінің жауынгерлері, жедел-құтқару жасақтарының құтқарушылары, ТЖМ әскери бөлімдерінің әскери қызметшілері, авариялық-құтқару авиациясының ұшу экипаждары, сейсмологтар, психологиялық қызмет өкілдері, жедел диспетчерлер де кезекшілікте болады.

«Бұл ретте 1200 бірлікке жуық құтқару техникасы жедел әрекет ету үшін дайын тұр. Барлық бөлімшелердегі  күштер мен құралдар тексерілді»  делінген хабарламада.

Төтенше жағдайлар министрлігі азаматтарды жаңа жылдық мерекелер кезінде қауіпсіздік шараларын сақтауға шақырады, қажет болған жағдайда 112 телефонына хабарласыңыз.