Жандарбек Бекшин зейнетке шықты

Алматы қаласының бас мемлекеттік санитарлық дәрігері Жандарбек Бекшин зейнетке шықты, деп хабарлады Санитарлық-эпидемиологиялық бақылау бөлімі.

«Алматы қалалық санитарлық-эпидемиологиялық бақылау департаментінің ұжымы мен аудандық басқарма басшылары Жандарбек Мұхтарұлы Бекшинді зейнеткерлік жасқа жетуімен құттықтап, лайықты демалысқа шығарып салды» делінген хабарламада.

Бекшинді қала әкімінің атынан Алматы қаласы әкімінің орынбасары Ержан Бабақұмаров құттықтады. Алматы билігі Жандарбек Бекшиннің Covid-19-ға қарсы күрестегі еңбегін жоғары бағалап, оның тәжірибесі мол жоғары білікті және беделді мамандардың бірі екенін атап өтті.

Әкімнің орынбасары Жандарбек Бекшинге шапан мен Алматы көрінісі бейнеленген естелік суретті сыйға тартты.

Айта кетсек, Алматының бас санитарлық дәрігері қызметінен 2022 жылдың басында кететіні 24 желтоқсанда белгілі болды. Ол 5 қаңтарға дейін демалыста болатынын да айтты.

Жандарбек Бекшин 2020 жылдың сәуірінде Алматы қаласы Тауарлар мен қызметтердің сапасы мен қауіпсіздігін бақылау департаментінің басшысы болып тағайындалды. Бұған дейін ҚР бас мемлекеттік санитарлық дәрігері қызметін атқарған.