Жанболат Мамайдың «несиелік амнистиясы»: белсендіні полицияға шақырды

14 желтоқсан кешке тіркелмеген Демократиялық партия бастамашыл тобының жетекшісі Жанболат Мамай Facebook парақшасында жазба жариялады. Ол өзінің үстінен жалған ақпарат таратқаны үшін қылмыстық іс қозғалғанын айтты.

«15 желтоқсанда сағат 15:00-де мені Алматы полиция департаментінің тергеу басқармасына жауап алуға шақырды. Бұл қазақстандықтарға несиелік амнистия жасау туралы талаптарымызбен байланысты екені анық.

Дегенмен, жалған ақпарат таратпағанымды ашық айтамын. Біз Агенттік басшылығымен бірнеше рет кездесіп, осының барлығын әлеуметтік желілерде тікелей эфирде көрсеттік» деп жазды Жанболат Мамай.

Оның айтуынша, бұл оған қатысты екінші қылмыстық іс.

 «Егер бірінші қылмыстық іс онша қиын болмаса, онда бұл айып бойынша мені үш жылға дейін бас бостандығынан айыру жазасы күтіп тұр» деп қосты белсенді.

Еске салсақ, өткен аптада Алматы полициясы несиелік амнистия туралы әдейі жалған ақпараттың таралуына қатысты сотқа дейінгі тергеуді бастаған болатын.

Бұл Қаржы нарығын реттеу және дамыту агенттігінің ғимаратына жүзге жуық қазақстандықтың басып кіруіне байланысты болды. Олар несиелерді есептен шығару мүмкіндігі туралы ақпарат алып, қарыздарын «кешіруді» талап ете бастады.