Жанболат Мамай жансақтау бөліміне түсті

Белсенді Инга Иманбай күйеуі Жанболат Мамайдың денсаулығы күрт нашарлағанын хабарлады.

Оппозициялық белсендінің жұбайы Инга ауруханада жатқан Жанболат Мамайдың жансақтау бөліміне ауыстырылғанын айтты.

«Оның денесіне қызыл бөртпе қаптап кетті, ештеңе көмектеспейді», - деп Инга Иманбай Денсаулық сақтау министрлігі мен Адам құқықтары жөніндегі уәкілге жүгінді.

Артынша  Инга Иманбай Orda.kz тілшісіне Жанболат Мамайға ауыр А гепатиті диагнозы қойылғанын айтты.

А гепатиті – вирустан туындаған бауырдың жұқпалы ауруы.

«16 мамырда Жанболат ауруханаға түсті. Қазіргі уақытта А гепатиті бойынша тағайындалған хаттама бойынша ем қабылдап жатыр. 16 мамырдан бастап дәрі-дәрмек, сонымен қатар тамырдан тамшылатып ем жіберуде. Бүгінде оның бүкіл денесінде бөртпе пайда болды,  аллергияның неден   екені белгісіз», - деді Иманбай.

Оппозиция белсендісінің  әйелі дәрігерлер әлі күнге дейін аллергиялық реакцияның себебін анықтай алмай отыр деп түсіндірді.

«Қазір бөртпе, яғни аллергия дененің жоғарғы бөліктеріне, мойынға жетті. Дәрігерлер түсіндіргендей, кез келген сәтте тұншығу басталуы мүмкін. Сондықтан олар Жанболатты  бақылауда болсын деп жансақтау бөліміне жатқызды. Әзірге жағдай өзгерген жоқ. Ол жансақтау бөлімінде  жатыр. Бөртпе сейілген жоқ», – дейді Инга Иманбай.

Дәрігерлердің айтуынша, аллергия  А гепатиті кезінде  бауырдың барлық нәрсеге  дерлік күрт реакция беруінің нәтижесі.